ఢిల్లీలో ఈసీకి వ్యతిరేకంగా నిరసన... ప్రకాశ్‌రాజ్‌తో కలసి వేదికపైకి పరకాల ప్రభాకర్

కేంద్ర ఎన్నికల సంఘం (ఈసీ) చేపట్టిన ఓటర్ల జాబితా ప్రత్యేక సవరణ (స్పెషల్ ఇంటెన్సివ్ రివిజన్ - సర్)కు వ్యతిరేకంగా ఢిల్లీలో జరగనున్న నిరసనలో ప్రముఖ ఆర్థికవేత్త పరకాల ప్రభాకర్ పాల్గొననున్నారు. అక్టోబర్ 23న (శుక్రవారం) జరగనున్న ఈ ఆందోళన కార్యక్రమంలో నటుడు, సామాజిక కార్యకర్త ప్రకాశ్‌రాజ్, కాక్రోచ్ జనతా పార్టీ వ్యవస్థాపకుడు అభిజీత్ దిప్కేలతో కలిసి ఆయన వేదికను పంచుకోనున్నారు.

'పీపుల్ ఎగైనెస్ట్ ఎస్ఐఆర్' కూటమి ఈ నిరసనను నిర్వహిస్తోంది. ‘ప్రతి వీధిలో ఒక జంతర్ మంతర్’ అనే నినాదంతో దేశవ్యాప్తంగా వికేంద్రీకృత నిరసనలకు నిర్వాహకులు పిలుపునిచ్చారు. ఎస్ఐఆర్ ప్రక్రియను తక్షణమే రద్దు చేయాలని, చీఫ్ ఎలక్షన్ కమిషనర్ జ్ఞానేశ్ కుమార్ తన పదవికి రాజీనామా చేయాలని డిమాండ్ చేస్తూ స్థానికంగా ఆందోళనలు చేపట్టాలని ప్రజలను కోరుతున్నారు.

ఎస్ఐఆర్‌పై పరకాల ప్రభాకర్ మొదటి నుంచి తీవ్ర విమర్శలు గుప్పిస్తున్నారు. ఇది కేవలం ఓటర్ల జాబితాను శుభ్రపరిచే కార్యక్రమం కాదని, ఏకపక్షంగా, కొన్ని వర్గాలను లక్ష్యంగా చేసుకుని ఓట్లను తొలగించడం ద్వారా భారత రాజకీయ సమాజాన్ని పునర్నిర్మించేందుకు జరుగుతున్న ‘లోతైన ప్రాజెక్ట్’ అని ఆయన ఆరోపించారు. ఎస్ఐఆర్‌ను పూర్తిగా రద్దు చేయడమే కాకుండా, ఏకంగా ఎన్నికల సంఘాన్నే రద్దు చేయాలని ఆయన ఇటీవలి కాలంలో డిమాండ్ చేస్తున్నారు. గతంలో బెంగళూరులో జరిగిన ఇలాంటి నిరసనలో కూడా ఆయన పాల్గొన్నారు.

ఈ నిరసనలో సీనియర్ న్యాయవాది ప్రశాంత్ భూషణ్, రైతు నాయకుడు రాకేష్ తికాయత్, ఏఐఎస్ఏ అధ్యక్షురాలు నేహా, రచయిత తుషార్ గాంధీ, పలువురు విద్యార్థి నాయకులు కూడా పాల్గొంటారని భావిస్తున్నారు. ఈ ఆందోళనకు మద్దతు ఇవ్వాలని ఇండియా కూటమి పార్టీలను నిర్వాహకులు కోరినప్పటికీ, వారి భాగస్వామ్యంపై ఇంకా స్పష్టత రాలేదు.